Gen 21 | TVK | STEP | Nggoni ngan taxa xa Iahova tehit xati, duxoh xat Serah.

Genesis 21

Hitxatien na Iahova mei Mistal be Reitin e Serah Nggur Aesak, Nat Ebraham

Senesis 21:1-21

1 Nggoni ngan taxa xa Iahova tehit xati, duxoh xat Serah. 2 Misak ni xi meas. E momal ni melele xa Hi tehit xati, xi nggur tuvava nan. Reitin, melele xa Ebraham be mometu ngamu, Serah nggur horamue tei nalu. 3 Ebraham miling hisen be 'Aesak' xa koute teni be 'menen' ^{▼▼21:3 Aesak, koute te hisen be 'Menen' vengan xa Ebraham temen e melele xa Hi tehiteni mini (17:17-19), e Serah mun temen melele xa telonge (18:12-14) e melele mun xa tehuri (21:6-7).}, 4 e melele xa melengien nan duxoh tol he sav (8), Ebraham pol ni be vexaho nggoni ngan taxa Hi tesemae ni mini. 5 Ebraham, huram nan hanutap lim (100) e melele xa Aesak latpesi. 6 E Serah bit, “Hi misa sien holu minou e misak ni nou namen. Ngan xil vus xa lilongeong ni limen itel nou. 7 ?Visi iaxa mikila vahiteni mi Ebraham xa inou tang, nitunat ni tuvava tei? E tave ti neta xa nabe tovolih, nanggur tuvava tei na mometu navan.”

8 Horamue ak matu, e melele xa miling sus man, tamen pol ni anien tei xa mahulong ven. 9 E melengien te anien nen ak, Ismael, nat Hakar tahal Isip, di misep pepamen ni Aesak, nat Serah. 10 Melele xa Serah pusi mak, biteni mi Ebraham bit, “!Sil rat atou te polien ak xal horamue nan laloha! Xosxa ukesae vatova, nat atou te polien ak nahur ti neta nam nave nan, e ihe na horamue nam Aesak tevi.” 11 Rin ak misak ni Ebraham minem holu vengan Ismael mun be horamue nan. 12 E Hi biteni mi Ebraham bit, “Onanexo ti ve horamue ak xal ninen xa be slev nam. Upol ni naha xa Serah biteni minuk vengan xa vatimol xil xa natehit xati minuk, xil listal lixo Aesak. 13 E Ismael, nat atou xa be slev xiak, inou nipol ni vatimol xil xa listal lixo en mei lihe vanut moletin tei xa eilep vengan xa xi mun be horamue nam.”

14 Misak ni, e makoe roroh, Ebraham misa anien e valoei tei mi Hakar e milingi de vatuvun. Di, misil rati del horamue nan luba. Xalu luba dit luka talang e uruvuol tahal Bersiba. 15 Melele xa oei bus, Hakar miling horamue nan de memal te holiei tei. 16 Di, be relingi be sotin vuteili, vengan xa bit, “!Aue li, ieok ti tavei li napus horamue navan vamat!” Ma, dotan e di muis.

17 Tave nousav ti, horamue mun muis e Hi milong tangen nan. Ma masxaxa tei na Hi misepin nggo ut nesao bemei mi Hakar bit, “?Hakar, di onexo veneh? !Ulum nakan ti! Hi milong tangen na horamue nam. 18 Tamea, uhe visali, uteli rati e ututou ni. Vengan xa inou, nipol ni ngan xil xa listal lixo vatimol nan mei lihe vanut moletin tei xa ihe eilep.” 19 Di, Hi misak ni Hakar pus vangoei tei. Misak ni, xi minggutih oei be valoei nan e misa rute mi horamue nan tengan vamu ni.

20 Di, Ismael tematu, e Hi tetutou ni. E uruvuol tahal Paran, xi temei tehe horam maxoe tei xa tehe moletin hos te kokoe en. 21 E melele xa mei tehe eilep, ninen tekamet atuli tei tahal Isip temei tetali tetela.